Påsketur med påskestemning!

I dag var det tid for litt påskeaktivitet. Sola var framme og det var berre å kome seg til fjells!:D

Truger vart valet i dag og sidan eg og skiskoa mine ikkje er heilt samde om alt...Eg fekk selskap på friskusturen min i dag. Jan-Arild og Pelle vart med på ski, og vi vende snuten mot støylen vår; Raufjell. Raufjell ligg på ca. 750 m.o.h og på vinterstid er det ein del høgdemeter stigning for å kome opp. Eg var litt skeptisk til å gå så langt på truger med turselskap som gjekk på ski, men eg tenkte at det skadar no ikkje å prøve (og var fullt klar over at nedatt måtte eg klare meg sjølv;)).

Vi starta litt nedom Leite i dag (der eg gjekk nedatt frå "rørgateturen" min i går).

Leite i dag. Påskesola som mangla i går var framme i dag:D

Leite. Bilde mot rørgata.

Turfølget mitt klare til å spenne på seg skia på Leite.

Frå Leite bar det vidare oppover mot Raufjell i strålande sol. Til tider var det vankeleg å halde fylgje med dei på ski, men sidan det er ganske mykje stigning oppover gjekk det ganske greit. Det største problemet var vel at eg berre MÅTTE ha fotopauser heile tida. Men sånn er det med så fin natur og så fint vêr. Det MÅ dokumenterast;)

Utsikt nedover mot Leite.

Vinglete trugespor. Det var ikkje promille inne i bildet, men blir litt "fram og tilbake" når ein leitar etter gode motiv;)

Framme på Raufjell!

Obligatorisk "påsketursjokolade":)

Strålande nøgd trugegåar i sol:D

Vi brukte heile 1 time og 52 minutt opp, men det var inkludert fotopauser og "snakkemedkjentfolkpauser". Dette var jo mest å rekne for ein søndagstur:) Nedatt var mine to turkameratar flinke å vente på meg av og til, heilt til eg sa til dei at det var ikkje nødvendig;) Eg storkosa meg i sola og jogga mykje av vegen nedatt. Jogging på truger funkar fint så lenge det er litt underlag ein kan sige ned i (det er ikkje godt å jogge på tettpakka underlag med truger) og litt nedoverbakke. Det følest stødig og godt, og ein kjem seg fort fram. Nedatt brukte eg 57 minutt. Dette var inkludert fotopause og gåing på grusveg uten truger dei siste 15 minutta (måtte gå heilt heimatt sidan turfølget mitt tok bilen. Men dette var planlagt:)).

Nerdefakta

Tid: 2 timar og 49 minutt.

Lengde: 9,16 km.

Kaloriar brukt: 885.

Snittpuls: 158.

Total stigning: 503 høgdemeter.

Ein strålande flott påsketur i strålande sol og med flotte turkameratar! "Alle var enige om at det var ein fin tur";)