På Sicilia i Italia ligg Europa sin høgste vulkan (3323 m.o.h.) Etna. Dette er og den mest aktive vulkanen i verda. Etna står på Unesco si verdsarvliste. Lengst nede i "lia" på Etna vert det drive jordbruk (opp til ca. 700 m.o.h.) og vin frå vulkansk jord skal visst vere serskilt god! Lenger oppover endrar naturen seg og det er fleire småkrater av varierande storleik, som vert danna på sidene av vulkanen når den har utbrot. På toppen av Etna finn ein hovudkrateret som er omlag 500 m breitt og 300 m høgt. Sjølvsagt måtte eg og Olsbø ta turen til Etna då vi var i nærleiken!
Etna sett frå den arkeologiske parken i Giardini-Naxos, på austkysten av Sicilia.
Eigentleg hadde vi tenkt å få ein skikkeleg fjelltur til fots ut av det, men det viste seg å vere vanskeleg å gjennomføre når vi ikkje hadde leigebil... Så då var det berre å innsjå nederlag og heller vere med på ein organisert tur med transport heile vegen. Opp skulle vi iallfall!
Turen starta med busstur opp til 2000 m.o.h. Her finn ein kratera som vart danna etter utbrot på 1800-talet.
På turen opp fekk vi besøke ein landsby som berre akkurat hadde sluppe unna lavastraumen i eit av Etna sine mange utbrot. Lavastraumen hadde stoppa berre meter frå eit av husa i utkanten av landsbyen. Snakk om englevakt!
Etter bussturen opp til 2000 m.o.h. venta ein tur med kabelbane opp til 2500 m.o.h.
Etter kabelbana, som tok laaaaang tid då det var fleire mindre stopp der vi hang og svaia i vinden i tidvis tjukk skodde, gjekk turen vidare i "minijeep" til 3000 m.o.h. Vel, det er iallfall dei største jeepane eg har sett!
På 3000 m.o.h. finn ein kratera som vart danna ved utbrota i 2001-2002 (førebels dei siste utbrota). På bildet er eitt av kratera frå 2001-2002 rett nede til høgre (ein kan sjå dampen frå det), medan hovudkrateret på 3323 m.o.h. ligg gøymt i skodda rett over hovudet mitt.
Nærbilde av eine krateret frå 2001-2002.
Folkevandring langs kraterkanten.
Ei vulkanmarihøne.
Krater frå 2001-2002 med hovudkrateret bak.
Det andre av kratera frå 2001-2002.
